圖：和這位朋友以前小時候打機的光碟...... 美好時光。
假期同朋友打邊爐，朋友佢本身係老師，但有啲想試吓創業，但又諗嚟諗去好多嘢唔係好 Sure，心大心細，令我諗起最近睇書睇到以下依個故事，分享比佢又俾大家睇吓：
話說有一間新學校起好咗，但有一件事啲人仲好爭議：我哋應該將行人路鋪喺草地上嘅邊度？有啲人認為行人路應該繞著草地過，以保持草地綠色。有啲人則認為行人路應該直接穿過草地。 其中一名男人建議：今年就唔好再起任何行人路喇。嗱咁樣，到咗年底， 睇下邊度啲草已經比人踩到枯哂，咁就顯示咗啲學生行嘅方向。然後到時只需鋪設依啲路徑即可。
簡直天才。
人類有一種自然傾向，好想要喺事先弄清楚一切。創業如是，但其實做好多人生重大嘅決定都如是：移唔移民、轉唔轉工、生唔生小朋友...... 但事實上，好多事係無論如何都無法 100% 做好準備。其實好多時，往往係去到要做咗依個決定之後嘅一段時間你先知個決定係啱定錯。你永遠唔會夠聰明，亦永遠唔會 100% 確定下一步應該做啲乜。只有隨著時間推移，條路先自然會變得更加清晰，就好似上面故事中草地上嘅行人路一樣。
當然以上唔係鼓勵大家咩都唔諗後果「做咗先算」，但如果我哋常常一直爭論、思考同「準備」我哋到底該做啲咩，遲早人生眨吓眼就過去，而我哋卻咩都無做到。
所以如果你有夢想去追，而諗過都覺得值得試下嘅，好似 Sir Richard Branson 咁講，Screw it, lets do it! 即係中文嘅：「咪講咁多！做啦！」
#147 不理外界隨心所欲（30/03/2025）